БИШКЕК, 8-фев. — Sputnik. ФИФАнын март айындагы рейтингинде Кыргызстан 105-орунда калаарын football-rankings.info сайты жазып чыкты.
Эске сала кетсек, Кыргызстандын футбол боюнча курама командасы Дүйнөлүк футбол ассоциациясынын 4-февралда чыгарган жыйынтыгы боюнча жаңы рекорд жаратып, рейтингинде 105-орунга көтөрүлгөн.
Александр Крестининдин жетекчилиги астында улуттук курама командасы үч ай катары менен жаңы рекорддорду коюуда. Декабрь айында 2006-жылкы рекордду (119) жаңыртып 108 сапты ээлесе, январь айындагы жыйынтык боюнча 107-орунга татыган.
Сайттын алдын ала божомолуна ылайык, футбол боюнча улуттук курама ФИФАнын 3-мартта жарыялана турган жыйынтыгы боюнча 324 упай менен 105-орунду сактап калат.
Кыргызстандыктар акыркы беттешин 17- ноябрда Иорданияга каршы өткөрүп жеңишке жеткен. Кийинки оюн 29-мартта Тажикстанга каршы болот. Учурда курама команданын эсебинде 324 упай бар.
