БИШКЕК, 31-янв. — Sputnik. Кыргызстандын футзал боюнча курама командасына 30 жаштагы Эмил Канетов капитан боло турганын Футбол федерациясы билдирди.
Маалыматка ылайык, ал Жалал-Абаддын "Динамо" клубунун оюнчусу болуп саналат. Канетов буга чейин Польша жана Кытай чемпионаттарында ойноп келген.
Канетов — Кыргызстандын үч жолку чемпиону, үч жолку өлкө кубогунун ээси, Эл аралык Ысык-Көл оюндарынын төрт жолку чемпиону, Гуандонг (Кытай) шаарынын чемпиону. Ал 2010-жылы Кыргызстандын мыкты оюнчусу болгон.
Учурда улуттук команда Москвада машыгуулардан өтүп, февралда Ташкентте өтө турган Азия Чемпионатына даярдык көрүүдө. Кыргызстандын командасы "А" тайпасында Ливан, Сауд Аравиясы жана Өзбекстан футзалчылары менен беттешет.
