БИШКЕК, 30-янв. – Sputnik. Ысык-Көл облусундагы айланма жолду калыбына келтирүү иштеринин биринчи этабы башталды. Иштин толук бүткөрүлүшүнө 550 миллион доллар керектелет. Бул тууралуу вице-премьер-министр Олег Панкратов Ысык-Көлдө өткөрүлгөн коллегияда билдирди.
Анда 2015-жылдан тарта облуста ири масштабдагы долбоорлор ишке ашып баштаганы айтылды. Туризмди өнүктүрүү үчүн "Тамчы" эл арарлык аэропортунун учуу тилкеси кеңейтилиши менен заманбап аэронавигациялык жабдуулардын коюлушу бардык үлгүдөгү самолетторду кабыл алууга шарт түзүлгөн.
"Өткөн жылдын туристтик мезгилине карата Бишкек-Тамчы-Ош аба каттамдары ачылган. Учурда Алматы-Тамчы каттамдарын ишке киргизүү пландалып жатат", — деп билдирген Панкратов.
Анын айтымында айланма жолдун оңдолушу менен аба каттамдардын ачылышы туристтердин агымын жогорулатууга шарт түзөт.
