БИШКЕК, 18-янв. — Sputnik. Премьер-министр Темир Сариев Кыргыз-орус өнүктүрүү фонду жаңы ишканаларды ачууга керектүү жабдууларды сатып алууга насыяларды берип, мамлекеттик банктар аркылуу айыл чарба ишканаларына берилген насыялардын шартын жеңилдетүү керектигин билдирди.
Өкмөттүн маалыматын ылайык, бүгүн Сариевдин төрагалыгы алдында Кыргыз-орус өнүктүрүү фондунун ишмердигин кеңейтүү боюнча жумушчу жыйын өтүп, анда фонддун өлкө эконономикасынын тармактарына насыя берүүдөгү катышын кеңейтүү маселелери талкууланды.
Өкмөт башчы учурдагы шартта фонддун каражатын майнаптуу пайдалануу жана өлкө эконономикасынын тармактарына насыя берүүдөгү катышын кеңейтүүнүн үстүнөн иштөө керектигин белгиледи.
Бул багытта Сариев Кыргыз-орус өнүктүрүү фондунун ишин активдештирүү менен катар жаңы ишканаларды ачууга керектүү жабдыктарды сатып алууга насыяларды берүү, мамлекеттик банктар аркылуу айыл чарба ишканаларына берилген насыялардын шартын жеңилдетүү тапшырмасын берди.
Мындан улам, Экономика министрлиги менен "РСК-банкына" 20 күндүк мөөнөт ичинде тигүү тармагындагы ишканаларды колдоо боюнча атайын программа иштеп чыгуусун тапшырды.
