БИШКЕК, 15-янв. — Sputnik. Кыргызстан гидроэлектр станциялардын Жогорку Нарын каскадын куруу долбооруна чыгымдалган инвестициялык каражатты кайра төлөп бербейт. Бул тууралуу премьер-министрдин экономика боюнча кеңешчиси Кубанычбек Турдубаев билдирди.
Кыргызстан Камбар-Ата-1 ГЭСин жана Жогорку Нарын каскаддарын биргелешип куруу боюнча Россия менен түзүлгөн макулдашууну жокко чыгаруу жана буга жаңы инвесторлорду тартуу боюнча аракеттерди көрүп жатат. Россиянын учурдагы экономикалык абалы өз милдеттемелерин аткарууга жол бербейт.
"Макулдашууга эки өкмөт кол койгон. Өкмөттүк деңгээлде салынган каражатты кайтарып берүү милдетибиз жок", — деди Турдубаев.
Эл эми "Электр станциялары" ишканасынын директору Таалайбек Толубаевдин айтымында, макулдашууну денонсациялоо боюнча документтер даярдалып Россия өкмөтүнө жөнөтүлөт, андан кийин "Русгидро" компаниясына берилет. Ошондон кийин гана россиялык тарап сүйлөшүүлөрдү жүргүзө баштайт.
"Төлөмөр болбойбуз. Макулдашуу биздин күнөөбүз менен бузулуп жаткан жок. Документте милдеттер так жазылган", — деди Толубаев.
Башкы директордун айтымында, "Русгидро" тарабынан бөлүнгөн каражатка инфраструктуралык объектилер курулуп, даярдык иштери жүргөн.
"Русгидро" ишканасынын сайтындагы маалыматка ылайык, аталган долбоор өкмөттөр аралык макулдашуу менен бекиген. План боюнча каскад 237,7 мегаватт кубаттуулуктагы төрт ГЭСтен турмак. Өткөн жылдын жай мезгилине карата "Русгидро" эки миллиард рубль бөлүп, дагы бир миллиард рубль бөлүүнү убадалаган. Курулуштун жалпы баасы 700 миллион доллардан ашат.
