БИШКЕК, 2-янв. — Sputnik. Бүгүн, 2-январда, премьер-министр Темир Сариев Токтогул ГЭСинин иши жана авариялык жарактан чыккан жабдыктарды оңдоонун жүрүшү менен таанышканын ɵкмɵттүн маалымат кызматы билдирди.
Сариев ГЭСтеги иштен чыккан жабдыктарды алмаштыруу иштерин тездетип, калкты үзгүлтүксүз электр энергиясы менен камсыз кылуу ɵкмɵттүн негизги милдети экенин белгиледи.
"Токтогул ГЭСиндеги жабдыктардын иштен чыгышы биз үчүн абдан чоң коңгуроо. Себеби, энергетика системасындагы жабдыктар учурунда алмаштырылбай калган. Ошондуктан, биз ГЭСтерди реконструкциялоону тездетүүбүз зарыл. Бул жаатта ɵкмɵт ɵз ишин күчɵтүп, энергетиктерге дал ушундай тапшырма коет", — деди премьер-министр.
Ал эми 28-декабрда иштен чыккан Токтогул ГЭСинин 500 кВ кабелди алмаштырууга эки айлык мɵɵнɵт болжолдонууда. Учурда керектүү жабдыктар, адистер жетиштүү. Турдубаев калкты электр энергиясы менен үзгүлтүксүз камсыз кыларын, учурда жетиштүү резервдер бар экенин билдирип, Токтогул ГЭСинен тɵмɵндɵ турган ГЭСтердин кубаттуулугу жогорулатылганын кошумчалады.
"Учурда калкты электр энергиясы менен толук кандуу камсыз кылууга резервдер бар. Бирок учурдагы энергетикалык коопсуздукту күчɵтүү үчүн электр энергиясын импорттоо боюнча Казакстан менен сүйлɵшүүлɵр жүрүп, Экибастус ГРЭСи менен алдын-ала келишимге кол коюлду", — деди кеңешчи.
Премьер-министр Токтогул ГЭСиндеги оңдоо иштерин сапаттуу жана тез арада бүткɵрүүнү тапшырды.
