БИШКЕК, 21-дек. — Sputnik. Таш-Көмүрдө барак тибиндеги үй өрттөнүп, андан эвакуацияланган 25 кишинин экөө мейманканада, ал эми калганы тууган-уругунукуна жайгашканын Sputnik маалымат агенттигине шаардык өзгөчө кырдаалдар бөлүмүнүн жетекчиси Нуркан Медетбеков билдирди.
21-декабрга караган түнү барак тибиндеги үйдө өрт чыгып, онго жакын үй-бүлө баш паанексиз калды. Шаардын мэриясы учурда өрт өчүрүлүп, келтирилген чыгымдар такталып жатканын маалымдаган. Түнкү кырсыктан милиция жашоочуларды эшиктерин каккылап ойготуп, аларды сыртка алып чыгып куткарышкан.
Медетбековдун айтымында, кырсыкка алдын ала маалымат боюнча электр зымдарындагы чыңалуу себеп болгон. Өрттөн ден соолугуна залал келтирилген жарандар катталган жок.
"Турак жай өткөн кылымдын 30-жылдары жыгачтан салынгандыктан өтө тез күйүп кетти. Окуя болгон жерде үч өрт өчүрүүчү машина иштеди. Колдон келген аракетти жасадык", — деди ал.
Жетекчи учурда жергиликтүү бийлик жашоочуларды турак жай менен камсыздоо маселесин чечип жатканын кошумчалады.
