БИШКЕК, 21-дек. — Sputnik. Таш-Көмүр шаарында 21-декабрга караган түнү барак тибиндеги үйдө өрт чыгып, онго жакын үй-бүлө талаада калды.
Таш-Көмүр шаарынын мэриясынан билдиришкендей, учурда өрт өчүрүлүп, келтирилген чыгымдар такталууда.
Таш-Көмүр ШИИБдин маалыматына ылайык, милиция кызматкерлери жашоочулардын эшиктерин тээп ачып ойготуп, аларды сыртка алып чыгып куткарышкан.
"Учурда күйүп кеткен үйдө жашоого мүмкүн эмес. Үйдүн дубалдары гана калды. Көпчүлүгүнүн эмерек-кечеси күйүп кеткен", — деп милициядан билдиришти.
Жергиликтүү тургундардын маалыматына ылайык, өрт өчүргүчтөрдүн даярдыгы начар болгон. Эгер алардын шаймандары жайында болгондо өрттү өчүрүп калууга болмок экенин билдиришти.
Учурда келтирилген чыгымдар такталып, баш-паанексиз калгандарга чара көрүлүп жатат.
