БИШКЕК, 14-дек. – Sputnik. Өкмөттүн Баткен облусундагы өкүлү Жеңиш Разаков менен Кытайдын Ош шаарындагы консулу Суи Лицюнь жолугуп, эки тараптуу кызматташуу туурасында сүйлөштү.
Негизги талкуу эки тарап аймактын социалдык-экономикалык абалын жакшырта турган инвестициялар туурасында жүрдү.
Мындан сырткары Баткен облусунун Лейлек районундагы эркин экономикалык аймактын ишин илгерилетүү боюнча да сөз болду.
Сөз болуп жаткан Лейлек эркин экономикалык аймагынын жетекчиси Авазбек Гапыровдун берген маалыматында иш эми гана башталды.
"Азырынча жергиликтүү жети ишкана каттоодон өттү, баш-аягы канча субъект иш алып бара тургандыгы так эмес. Негизинен айыл чарба продукцияларын кайра иштетүүгө басым жасалат", — деп айтып берди Гапыров.
Жетекчи андан сырткары курулуш материалдарын да чыгаруу каралып жаткандыгын кошумчалады.
