БИШКЕК, 14-дек. — Sputnik. Ирактын ТИМинин башчысы Ибрагим аль-Джаафари жекшембиде анын өлкөсүнө түрк аскерлери киргизилгенден кийин пайда болгон каатчылыкты Багдад Анкара менен саясий жол менен чечүү ниетинде экенин билдирди деп маалымдайт Синьхуа агенттиги.
Ошону менен катар ал өлкөнүн көз карандысыздыгын жана аймактык бүтүндүгүн бузууга жол бербейт деп баса белгиледи.
"Биз Түркиянын басып киришине байланыштуу кырдаалды саясий жол менен чечүү ниетиндебиз. Түркия менен болгон мамилелерди сактап калууга умтулабыз, бирок эгемендүүлүк кызыл сызык болуп эсептелет… Каатчылыкка тартылып калуу — бул өтө жөнөкөй, бирок андан жөн эле чыгууга болбойт", — деди аль-Джаафари.
Ал абалды дипломатиянын жардамы менен жөнгө салуу зарылдыгын дагы бир жолу баса белгиледи.
Ирак бийлигинин маалыматтары боюнча, 4-декабрда түрк аскерлери жана бронетехника Ирактын Найнава провинциясына террористтер менен согушуп жаткан элдик отряддардын жоокерлерин даярдоо шылтоосу менен киргизилген. Ирактын ТИМи жана Коргоо министрлиги түрк аскерлеринин аракетин бийлик менен макулдашылбаган "кастык иш-аракет" деп баалаган.
Россиянын тышкы иштер министри Сергей Лавров ишембиде аль-Джаафари менен түрк аскерлерин киргизүүнү талкуулап жана Ирактын көз карандысыздыгын жана аймактык бүтүндүгүн колдой турганын билдирди. Анын орун басары Геннадий Гатилов жекшембиде Россия Ирактын түштүгүндө Түркиянын иш-аракеттерин мыйзамсыз деп атап, бул басып кирүүнү кандайдыр бир аргументтер менен актоо кыйын деп билдирди.
