БИШКЕК, 3-дек. — Sputnik. Айрым өлкөлөр менен Кыргызстандын бир тараптуу киргизген визасыз режими канчалык натыйжалуу экенин аныктоо зарыл. Бур тууралуу Sputnik агенттигине Жогорку Кеңештин эл аралык иштер, коргоо жана коопсуздук боюнча комитеттин төрагасы Алмазбек Баатырбеков билдирди.
Анын айтымында, депутат парламенттик комитеттин атынан өкмөткө кат жиберип, бир нече жыл мурун кабыл алынган 45 мамлекетке карата түзүлгөн визасыз режимди жоюунун натыйжасын тактап чыгууну өтүнгөн.
"Кабыл алынып жатканда бул мыйзамда чет элдик туристтердин көбөйүшүн шарттоосу каралган. Мен текшерип чыктым, долбоордун демилгечилери убадалагандай туристтер деле көбөйүп кетпептир. Мындан тышкары, бюджеттен болжол менен 20 миллион доллар чыгып калган", — деди Баатырбеков.
Депутат УКМК жетекчиси Абдил Сегизбаевдин террористтер визасыз режимди өз максатында пайдаланышы толук мүмкүн деген билдирүүсүн колдой турганын белгиледи.
"Мыйзам долбоорду кайрадан карап чыгууга Кыргызстандагы коопсуздук маселесине таасир тийгизе турган дүйнөдөгү татаал геосаясий абал да себепчи болду. Баарыбыз террористтердин Франциядан Европага жайбаракат "каттап" жатканына күбө болдук. Террористтердин биздин өлкөгө да ошондой эле жайбаракат кирип келишине эч нерсе тоскоол боло албайт", — деди ал.
Баатырбеков азырынча өкмөттөн эч кандай реакция кыла электигин билдирип, жакын арада жооп келерине ишеним артты.
2012-жылы Кыргызстан 60 күндүк мөөнөт менен дүйнөнүн өнүккөн 45 мамлекети үчүн бир тараптуу визасыз режим киргизген.
