Эшигин көрүп, төрүнө өт: премьер, мэр жана депутаттардын иш столу кандай?

Премьер-министр Темир Сариевдин жумушчу столу. Өкмөт башчынын жумушчу оруну кагаздардын көп болгонуна карабай дайыма жыйнактуу. Столундун үстүнө коюлган чырак көзгө дароо урунат. Сариев столун өзү жыйнайт экен.

Адилет министри Жылдыз Мамбеталиеванын жумушчу столу. Министр айым жумушчу столуна өтө аяр мамиле жасайт. Чыныгы юрист катары анын столундагы кагаздар ирээти менен керектүү жерге тыкан коюлган.

Геология жана минералдык ресурстар боюнча мамлекеттик агенттиктин төрагасы Дүйшөнбек Зилалаевдин жумушчу столу. Мекеменин башчысы тыкандыкды баалайт. Столду маалында жыйнап турса эле, көп чачылбайт дейт Зилалаев. Ал үч блокнотун дайыма жанында алып жүрөт. Бирөөсүнө өкмөттөн алган милдеттемелерди жазса, экинчисине кол алдындагыларга берген тапшырмаларды, үчүнчүсүнө күнүмдүк маселелерди жазат. Ошондой эле анын эспандери бар.

"Өнүгүү-Прогресс" фракциясынын лидери Бакыт Төрөбаевдин жумушчу столу. Фракция лидери гезит-журналдарга такай көз салат. Анын столунун жыйнактуу болушуна жардамчысы көз салып турат. Анын столундагы эң негизги китеп — бул Кыргызстандын Конституциясы.

Билим берүү жана илим министри Эльвира Сариеванын жумушчу столу. Эльвира Кубанычбековнанын столунан ашыкча эч нерсени көрбөйсүң. Керектүү документтердин бардыгы ноутбукта сакталуу.

Бишкек шаарынын мэри Кубанычбек Кулматовдун жумушчу столу. Шаар башчысынын жумушчу столунда кагаздар жайнайт. Эми ага таң калуунун деле кереги жок, себеби, ал шаардын баардык иштери менен алектенет. Жардамчылары анын столундагы ашыкча нерселерди дайыма алып турат.

"Республика – Ата-Журт" фракциясынын депутаты Мирлан Жээнчороевдин жумушчу столу. Эл өкүлү учурда жаңы мыйзам долбоорун иштеп чыгуу боюнча бардык күчүн жумшап жаткан кези экен. Андыктан, столунда Конституция менен ар кыл кодекстер турат. Ал жумушчу ордун таза кармап, иштөөгө ыңгайлуу кармоого аракет кылат.

Мамлекеттик салык кызматынын төрагасы Замирбек Осмоновдун жумушчу столу.
Салык кызматынын башчысы негизинен электрондук документация менен иштейт. Белгилей кетсек, бул кызмат өз ишмердигинде электрондук документацияны активдүү колдонуп жаткан мамлекеттик мекемелердин бири. Осмонов келечекте, ал жетектеген кызмат жалаң гана бул система менен иштейт деп тилек кылат.

КСДП фракциясынын депутаты Азамат Арапбаевдин жумушчу столу. Азамат Арапбаев жумушчу ордунун дайыма тыкан болуп туруусун жактырат. Бир күндө эки жолу столундагы ашыкча кагаздарды тазалап турат. Эл өкүлдөрүнүн бардыгынын столдору менен стулдары коендой окшош болгонуна карабай Арапбаев алар абдан ыңгайлуу экенин айтат. Башкысы иштеш керек дейт эл өкүлү.

"Өнүгүү-Прогресс" фракциясынын депутаты Исхак Масалиевдин жумушчу столу. Күч түзүмүндө иштеп калгангабы, айтор, Масалиев бардык жерде тартипти жактырат. Жумуш күн аяктагандан кийин ал бардык документтерди өз ордуна коет. Бул чакырылыштагы кагаз иштер мурдагыларга салыштырмалуу бир кыйла эле аз болуп калганын белгилейт. Мурда кагазга көмүлүп калышса, азыр көпчүлүк мыйзам долбоорлору электрондук вариантта келип, кагаздардын санын азайткан.

Мамлекеттик каттоо кызматынын төрагасы Тайырбек Сарпашевдин жумушчу столу. Сарпашевдин Мамлекеттик каттоо кызматына келгенине аз гана болду. Ошентсе да ал, иш бөлмөсүнө жана столуна бат эле көнгөн сыяктуу. Ал столун өзү иретке келтирүүгө аракет кылат. Адамдын ишиндеги тартип анын столунан башталат дейт ал.

Өкмөттүн маалымат кызматынын башчысы Назира Ахмедованын жумушчу столу. Ахмедова анын столу дайыма эле иретүү боло бербесин айтат. Бир күндө 4-5 жыйын болгондуктан столго документтер бир топ эле чогулуп калат. Ошентсе да, жумуштан кетер алдында столун жыйнаганга аракет кылат.