БИШКЕК, 3-дек. — Sputnik. Кыргыз-россиялык өкмөттөр аралык комиссиясы энергетика, өнөр жай жана транспорт жаатындагы маанилүү маселелер талкууланып, негизинен "Камбар-Ата — 1" жана "Камбар-Ата — 2" ГЭСтеринин курулуштарына көп көңүл бурулганын жыйындын жыйынтыгы менен премьер-министр Темир Сариев билдирди.
Анын айтымында, өзгөчө энергетика маселесин талкуулоо оорчулук жараткан.
"Бир пикирге келе алдык. Мындан тышкары, Кыргызстандын газ менен камсыздоону уланта турган "Газпром" компаниясынын долбоорлорун өнүктүрүү боюнча инвестициялык пландарын ортого салдык", — деди ал.
Сариев мунай зат продукциясын соодалоо рубль менен жүргүзүү боюнча чечилгенин кошумчалады.
"Кийин токой жана курулуш материалдарын, металл продукциясын да рубль менен сатыл алууга жол ачылышы мүмкүн", — деди өкмөт башчы.
Бишкекте бүгүн, 3-декабрь күнү Кыргыз-россиялык өкмөт аралык соода-экономикалык, илимий-техникалык жана гуманитардык кызматташуу боюнча комиссиянын 18-жыйыны өтүп, ага премьер-министр Темир Сариев менен РФ Федералдык бажы кызматынын жетекчиси Андрей Бельянинов төрагалык кылды.
