БИШКЕК, 2-дек. — Sputnik. Кыргызстан мусулмандарынын дин башкармалыгы (КМДБ) өлкө аймагындагы дааватчылардын бардык аракеттери тийиштүү органдар тарабынан тыкыр көзөмөлгө алына турганын билдирди.
Муфтият тараткан билдирүүдө дааватчылардын иш-аракеттери көзөмөл алдында экени, ал КР Мусулмандар дин башкармалыгы жана ИИМдин тийиштүү органы тарабынан тескеле турганы айтылат.
"КМДБнын алдында даават бөлүмү 1997-жылы Каптагаев Дин иштери боюнча мамлекеттик комиссияны жетектеп турганда түзүлгөнүн өзү билиши керек эле. Даават бөлүмү дал ошол дааватка чыккандардын иш-аракеттерин көзөмөлдөйт. Коомдогу бүгүнкү туруктуулуктун болушунда элди жамандан алыс болууга үндөгөн дааватчылардын да салымы бар", — деп айтылат билдирүүдө.
Муфтият дааватчылар элди митингдерге чогулууга эмес, тычтык, бакубат жашоого үндөй турганын баса белгилейт. Ошондой эле, кандайдыр бир билдирүү жасар алдында эксперттердин чыгарган расмий бүтүмдөрүнө таянуу керектигин кошумчалайт.
