БИШКЕК, 15-ноя. — Sputnik. Азирети муфтий Максатбек ажы Токтомушев Кыргызстандагы мечиттерди каттоодон өткөрүү боюнча облустук жана шаардык казыларга катуу талап койгонун муфтият билдирди.
Маалыматка ылайык, кечээ Кыргызстан мусулмандарынын дин башкармалыгынын жыйындар залында облустук казылардын 2015-жыл ичинде аткарган иштери боюнча жыйын өттү.
Бул жыйында ар бир облустун казысы муфтийге 2015-жылы аткарылган иштери туурасында маалымат берип, өздөрүнүн ишмердүүлүгү менен тааныштырды.
Буга чейин Кыргызстандын түндүк-түштүк аймактарынын тескеген Азирети муфтийдин орун басарлары Равшан Эратов ажы жана Замир Ракиев кары ар бир облуста болушуп, казыяттардын иши, көрүп жаткан чаралары менен таанышып чыгышкан.
Казылардын маалыматтары угулган соң алардын иштерине тиешелүү баалар коюлду.
