БИШКЕК, 27-ноя. — Sputnik. Улуттук валюта курсунун кескин секиригине жол бербөө үчүн жетиштүү деңгээлде резерв бар. Бул тууралуу премьер-министр Темир Сариев улуттук валютанын курсун турукташтыруу чаралары боюнча атайын билдирүү учурунда айтты.
Сариев мындай абал валюта рыногундагы спекулятивдик аракеттердин жана айрым коммерциялык банктардын туура эмес ишинин натыйжасында жаралганынын белгиледи.
"Кыргызстанда сомдун курсу эркин коюлган. Мында валюталык интервенциялар сом курсунун кескин секиригине жол бербөө максатында ишке ашырылат. Буга байланыштуу мен учурда улуттук валюта курсунун кескин өзгөрүшүнө жол бербөө үчүн жетиштүү деңгээлде резерв бар экенин билдиргим келет. Кечээ Улуттук банк интервенцияны ишке ашырган соң валюта рыногундагы абал турукташты", — деди премьер-министр.
Өкмөт башчы буга карабастан дүйнөдөгү валюталык рынокто доллардын курсу бекемделип, жыл башынан бери 26 пайызга кымбаттаганын кошумчалады. Буга байланыштуу кыргыз өкмөтү улуттук валютанын курсун турукташтыруу боюнча бир нече чара көрөрүн билдирди.
"Кыргызстанда экспортту стимулдаштыруу жана жеңилдетилген насыяларды берүү менен экспорттук өнөр жайды колдоо боюнча программа ишке ашырылат. Туризм тармагын өнүктүрүү менен валюталык агымды алып келүүгө жол ачуу жана салык мыйзамдарын реформалап, өлкөдөгү бизнес жүргүзүү шарттарын түзүү боюнча иштерди активдештирүү зарыл", — деди өкмөт башчы.
Ал кирешелерди администрациялоонун деңгээлин жогорулатуу жана контрабандалык товарларды алып кирүүгө көзөмөл күчөтүлүп, кыймылсыз жана кыймылдуу мүлктөрдү сатып алууда улуттук валюта аркылуу иш жүргүзүүгө өтүү карала турганын маалымдады.
Премьер-министр жергиликтүү бийлик органдары жана укук коргоо органдарына аймактарда товар жана кызматтын баасы жана алып-сатууда улуттук валюта менен жүргүзүлүп жатканын көзөмөлдөө тапшырмасын берди.
Экономика жана өнөр жай министрлиги жана Улуттук Банкка "Газпром" компаниясы менен сүйлөшүүлөрдү өткөрүп, сатып алууну рубль менен жүргүзүүнү макулдашууну тапшырды.
Ал эми Финансы министрлигине Улуттук Банк менен биргеликте бюджеттик сектордун кызматкерлери үчүн доллар менен алынган ипотекалык насыяларды улуттук валютага трансформациялоону жүктөдү.
