БИШКЕК, 27-ноя. — Sputnik. Кыймылдуу жана кыймылсыз мүлктү сатуу жана сатып алуу операциялары улуттук валюта менен гана жүргүзүлүшү керектигин премьер-министр Темир Сариев валюта рыногунун абалына карата өткөрүлгөн жыйында билдирди.
Сариев өлкө аймагында жүргүзүлүп жаткан төлөмдөрдү жөнгө салууну жакшыртуу зарыл экенин белгиледи.
"Мамлекеттик органдар транзакцияны улуттук валюта менен гана жүргүзүшү керек. Мында кеп кыймылдуу жана кыймылсыз мүлктү сатуу жана сатып алуу жөнүндө болууда. Мындан тышкары баалар, рекламалык материалдарда жазылган нарк маалыматы да улуттук валютада чагылдырылышы керек", — деди өкмөт башчы.
Премьер-министр Улуттук банк Мамлекеттик экономикалык кылмыштуулукка каршы күрөшүү кызматы менен биргеликте лицензиясыз иш алып барган акча алмаштыруучу жайларды текшерүүсүн тапшырды. Анын айтымында, валюта операцияларын өткөрүү боюнча эрежелерди бузгандар үчүн айып пулду жогорулатуу керек.
"Муну менен бирге ЕАЭБ мамлекеттери менен соода жасоодо улуттук валюта менен эсептешүү механизмдерин иштеп чыгуу зарыл", — деди Сариев.
Жыйын соңу менен өкмөт башчы Каржы министрлигине Улуттук банк менен биргеликте доллар менен алынган ипотекалык насыяларды сомго которууну тапшырды.
