БИШКЕК, 19-ноя. — Sputnik. Жогорку Кеңешке КСДП партиясынын тизмеси менен депутат болуп келген Мээрбек Мискенбаев Бишкек шаарындагы көчөлөргө жана парктарга "7-апрель" атын берүүнү сунуштап жатканын Sputnik агенттигине билдирди.
Буга чейин бир катар ЖМКлар депутат шаар көчөлөрүнө жана парктарга апрель революциясында каза болгондордун аттарын берүүнү сунуштап жатат деп жазып чыгышкан.
Депутат анын айткандарын айрым ЖМКлар туура эмес түшүнгөнүн белгиледи.
"Биз шаардагы негизги көчөлөрдүн атын "7-апрель" кылып өзгөрткүлө деп айткан жокпуз. Жаңы салынып аткан, же аты жок көчөлөргө берсе деген идеяны мэрия менен өкмөт карап чыкса деп жатабыз. Биз каза болгон ар бир баатырдын атын эмес, Кыргызстандын кайрадан жаралуу күнү деген мааниде "7-апрель" деген атты берүүнү сунуштап жатабыз", — дейт ал.
Эл өкүлү ошондой эле, шаарда каралбай калган парктарга да "7-апрель" атын берүүнү сунуштап, эгер ал ишке ашып калса, апрель революциясынын катышуучуларынын коому өз каражатына парктын чеке-белин тосуп, бак, арча тигип көрктөндүрүшөрүн айтты.
"Биз, шаардын ортосундагы "Ататүрк", же Панфилов паркынын аталышын өзгөрткүлө деген жокпуз. Шаардын чексинде каралбай калган парктарга деле беришсе ал жакты көрктөндүрүү боюнча тилектерибиз бар", — дейт депутат.
Мээрбек Мискенбаев буга чейин "Айкөл Ала-Тоо" коомдук бирикмесинин жетекчиси болгон.
2010-жылы 7-апрель күнү болгон элдик революцияда 77 киши каза болгон. Алардын кээсинин сөөгү "Ата-Бейитке"коюлган. Кийин алган оор жаракаттардан улам каза болгондордун саны дагы өскөн.
