БИШКЕК, 19-ноя. — Sputnik. Борбор калаада "Алга" футболдук клубунун ардагери Нурлан Ниязалиевдин элесине арналган өспүрүмдөр арасындагы футбол боюнча мелдеш башталганын мэрия билдирди.
Маалыматка ылайык, турнирге Бишкектин футболдук клубдары менен спорт мектептеринде окуган 10-11 жаштагы балдар катышат. Таймаш "А" жана "В" тайпасында өтүүдө.
"А" тайпасында "Дордой 2004", Олимпиада резервинин спорт мектеби, "Жаштык" жана "Бешик-Таш" командалары кирсе, кийинки топто "Абдыш-Ата", Футболдук борбор, Олимпиада резервинин атайын мектеби жана "Дордой-2005" командалары беттешет.
Дене тарбия жана спорт боюнча шаардык комитет уюштурган мелдеш жаш муундун арасында спортту өнүктүрүү жана мыкты оюнчуларды аныктоо максатын көздөйт.
Турнирдин финалы 21-ноябрь күнү өтөт.
