БИШКЕК, 16-ноя. — Sputnik. Ош облусунун Кара-Суу районундагы Нариман айыл өкмөтүнүн жетекчиси 500 доллар пара алып жаткан жеринен кармалганын УКМК билдирди.
Маалыматка ылайык, айыл өкмөт жаңы курулган социалдык долбоор — маданият үйү менен балдар аянтчасын пайдаланууга берүү үчүн инвестициялык келишим түзүп берүү үчүн 1500 доллар өлчөмүндө пара доолап, анын 50 миң сомун буга чейин алып койгон.
Аталган факт боюнча кылмыш иши козголуп, айыл жетекчиси учурда УКМКнын тергөө абагына бир айлык мөөнөт менен камакка алынды.
Кармалган айыл өкмөткө тергөө учурунда аныкталган дагы беш кылмыш иши боюнча айып тагылууда. Негизинен ал Нариман айыл өкмөтүнө караштуу жер тилкелерин мыйзамсыз берип келген.
Бул боюнча эки жолу камакка алынып, бирок экинчи инстанциядагы соттун чечими менен жоопкерчиликтен кутулуп келген.
