БИШКЕК, 8-ноя. — Sputnik. Кыргызстанда дүң жана чекене сооданын көлөмү азайганына байланыштуу экономика министринин орун басары Данияр Иманалиев Соода-өнөр жай палата, базар ассоциациясы, "Дордой" жана "Кудайберген" рынокторунун өкүлдөрү менен жолугушуу өткөрдү.
Соода тармагынын өкүлдөрү буга бажы көзөмөлүнөн өтүү татаалдыгы себеп экенин айтышты. Ишкерлердин ЕАЭБ мамлекеттерине товар алып келүүдөгү эреже-тартиптерди билбестиги абалды ого бетер курчутууда. Алардын айтымында, бул материалдык зыян алып келип, убакытты да коромжу кылып жатат.
"Бул тоскоолдуктар товардын өздүк баасын жогорулатып жиберет, мындан жергиликтүү рыноктор жабыр тартууда. Өлкө аймагына товар киргизүү шарттарынын өзгөрүшү майда ишкерлер үчүн оорчулук жаратып жатат. Эгер ал башка ишкерге кошулуп иштесе, бул бажы чек арасында документтерди толтуруу үчүн бир топ убакытты алууда", — дешти ишкерлер.
Дагы бир тоскоолдук катары соодагерлер транспорттук ташууларга болгон бааны белгилешти.
Жолугушуунун жыйынтыгы менен Бажы, Салык, Жол кайгуул кызматтары жана ИИМ өкүлдөрүнүн катышуусу менен дагы бир жыйын өткөрүү пландаштырылды.
