БИШКЕК, 5-ноя. — Sputnik. Күзгү жана жазгы каникулдар окуу саатын болушунча так аткаруу максатында кыскартылганын Билим берүү жанат илим министрлиги билдирди.
Маалыматка ылайык, министрликтин базистик окуу планы боюнча күзгү жана кышкы каникулдар 30 күндү түзүп, күзгү каникулга беш күн бөлүнсө, кышкы каникул 25 күнгө созулат.
"Быйыл 1-4-класстын окуучулары үчүн окуу 10-ноябрда башталса, алты күн окуган 5-11-класстар үчүн экинчи чейрек 9-ноябрда башталат", — деп айтылат билдирүүдө.
Каникулга бөлүнгөн күндөрдү эсепке албаганда 1-класстын окуучулары 33 жума окуса, 2-4-класстар үчүн 35 апта каралган. 5-11-класстар экзамен берүү убактысын кошкондо 34-36 жума окушу шарт.
Мындан улам күзгү каникул беш күн — 4-9-ноябрь, кышкы каникул 25 күн — 31-декабрдан 24 январга чейин, жазгы каникул беш күн — 17-22-март күндөрү болору белгиленген.
