БИШКЕК, 23-окт. — Sputnik. Япониянын компаниялары Борбор Азия долбооруна эки триллион иен (16,6 миллиард доллар) салууга ниеттенип жатканын Nikkei Asian Review маалымат агенттиги билдирди.
Япон өкмөтүнүн башчысы Синдзо Абэ 22-28-октябрь күндөрү Монголияга жана Борбор Азия өлкөлөрүнө иш сапары менен жүрөт. Ал Кыргызстанга, Тажикстанга, Түркмөнстанга жана Өзбекстанга барууга ниеттенүүдө. Аны Япониянын ири 50 компаниясынын өкүлү коштоп жүрөт, анын ичинде соода борборлорунун, банктардын жана университеттин өкүлдөрү бар.
Агенттиктин маалымдашынча Абэнин иш сапары аймакка болгон Япониянын кызыкчылыгын күчөтүп, анын ичинде Түркмөнстандагы газ өндүрүш долбооруна багытталган.
"Галкыныш" кенинин жарым жабдуу боюнча "Түркмөнгаз" мамлекеттик корпорациясы менен меморандумга кол коюлат. Газ түтүгү дал ушул жерден башталып, төрт мамлекетти — Түркмөнстан, Афганистан, Пакистан менен Индияны аралап өтөт. Долбоорду Япониянын эки банкы каржылайт.
Күн чыгыш өлкөсү Өзбекстанга газды кайта иштетүүчү завод курууну пландап жатат. Жолугушууда 110 миллиард иендик (917 миллион доллар) келишимге кол коюлат. Премьер-министрди коштоп жүргөн компаниянын өкүлү Өзбекстанда инфраструктуралык оптикалык байланышты куруу боюнча сүйлөшөт.
Ал эми Кыргызстан менен Тажикстанга болгон иш сапары учурунда магистралдык жолдорду жакшыртуу боюнча макулдашууларга кол коюлушу күтүлүүдө.
Япониянын Кыргызстандагы элчилиги билдиргендей, Абэнын КРге болгон иш сапары учурунда өкмөттөр аралык жети документке жана жеке ишканалар боюнча эки меморандумга кол коюлат.
Сүйлөшүүлөр учурунда эки мамлекеттин кызматташуусунун кеңири тармактагы маселелери талкууланат.
