Япониянын премьери Кыргызстанга Атамбаевдин чакыруусу менен 26-октябрда келет

БИШКЕК, 22-окт. — Sputnik. Япониянын премьер-министри Синдзо Абэ Кыргызстанга 26-октябрда келе турганын Тышкы иштер министрлиги билдирди.

Япониянын өкмөт башчысы кыргыз жергесине биринчи жолу президент Алмазбек Атамбаевдин чакыруусу менен келмекчи.

Иш сапарынын алкагында Синдзо Абэ Атамбаев жана кыргыз кесиптеши Темир Сариев менен жолугуп, эки тараптуу сүйлөшүүлөрдү жүргүзөт.

Жолугушуу учурунда Кыргызстан менен Япониянын ортосундагы кызматташууну кеңейтүү маселелери каралат. Мында япон тарапка Кыргызстандын соода жана экономикалык мүмкүнчүлүктөрү көрсөтүлүп, эки жактын кызыкчылыгына төп келген аймактык жана эл аралык маанидеги маселелер талкууланат.

Мындан тышкары, япон премьер-министринин иш сапарынын алкагында кыргыз-япон инвестициялык форумунун өтүшү күтүлүүдө.

Сүйлөшүүлөрдүн жыйынтыгы менен эки тараптуу документтерге кол коюлат.

Япон өкмөт башчысы Борбор Азияга болгон иш сапарында 22-октябрдан 28-октябрга чейин Кыргызстан, Тажикстан, Түркмөнстан жана Өзбекстан мамлекеттерин кыдырары пландалууда. Буга чейин Синдзо Абэ Борбор Азия мамлекеттерин август айында кыдырууну пландаган, бирок иши көп болгондуктан, иш сапары октябрь айына жылдырылган.