БИШКЕК, 20-окт. — Sputnik. Суу түтүгүн орнотууга бөлүнгөн акчаны өз ара бөлүп алган Жети-Өгүз районундагы Дархан айыл аймагынын кызматкерлерине карата кылмыш иши козголгонун УКМК билдирди.
Маалыматка ылайык, 2012-жылы аталган айыл жашоочуларын таза суу менен камсыз кылуу максатында бюджеттен 1 миллион сом бөлүнгөн. Ага жоопкер кызматкерлер "Жоомарт-Элес" ишканасы менен жең ичинен сүйлөшүп, жалган тендердин жыйынтыгы менен аталган компанияны жеңүүчү деп тапкан.
Ал эми бөлүнгөн каражатты Дархан айыл өкмөтүнүн менен "Жоомарт-Элес" ишканасынын жетекчилиги өз ара бөлүп алган. Ушул убакка чейин суу түтүгүн орнотуу иштери аягына чыга электиги маалым болду.
Коррупцияга каршы кызматтын чогулткан материалдарынын негизинде Жети-Өгүз районунун прокуратурасы "Кызмат абалынан кыянаттык менен пайдалануу" жана "Документ жасалмалоо" беренелеринин негизинде кылмыш ишин козгоду.
Тергөө иштери улантылууда.
