БИШКЕК, 16-окт. — Sputnik. Түрмөдөн качкандардын бири Данияр Кадыралиев кармоо учурунда ал милицияларга бычак менен карышылык көрсөтүүгө аракет кылганда, атып өлтүрүлгөн. Бул маалыматты Бишкек Шаардык ички иштер башкармалыгынын маалымат кызматынан билдиришти.
№50 түрмөдөн качып, издөөгө алынган төрт кылмышкердин бири бүгүн жок кылынгандыгын ИИМ билдирген. Буга чейин милицияга качкындар "Дордой" базарында жүрүшү мүмкүн деген маалымат түшкөнү айтылган. Түндөн тарта базардын айланасы курчоого алынып, учурда милиция аталган аймак менен "Энесай" жаңы конушун тинтүүгө алган.
Түрмөдөн киши өлтүрүп качкандарды издөө иштери улантылып жаткандыгын Шаардык ички иштер башкармалыгынын маалымат кызматынан билдиришти.
Дүйшөмбүнүн түнүндө Чүй облусунун Нижный Нооруз айылында 11-октябрдан 12-октябрына караган түнү №50 түрмөдөн тогуз кылмышкер качып чыккан. Качуу учурунда алар түрмөнүн үч кызматкерин өлтүрүп, бир кызматкерди жарадар кылышкан. Алардын бешөө ошол түнү эле кармалган. Жарадар болгон Тилек Абылгазиев кызматкерге эки операция жасалгандан кийин, кечээ түнү эсине келе албаган тейде көз жумган.
ИИМ өлкө жарандарына кайрылып, качкандарды кармоого көмөк көрсөтүүнү, алардын жашырын жаткан жери боюнча маалыматтарды билсе, органдарга билдирүүнү суранды. Ал эми УКМК качкындардын башына 300 миң сом сайган.
