БИШКЕК, 16-окт. — Sputnik. Азыр "Энесай" жаңы конушундагы мектепте сабак кадимкидей эле жүрүп жатат. Бул туурасында Энесай жаңы конушундагы №21 мектептин директору Гайде Умарова билдирди.
Мындан бир нече күн мурда №50 түрмөдөн качкан кылмышкерлердин бири атып өлтүрүлгөн "Дордой" базарынын жанындагы "Энесай" жаңы конушунун бир бөлүгү курчоого алынып, кирген-чыккандар көзөмөлгө алынууда.
"Азыр укук коргоо кызматкерлери мектептин айланасында турушат. Ата-энелер балдарын мектепке таштап, өздөрү ишке кетти да. Азыр таратып жиберсек, үйүндө киши жок болсо, кандай болот. Андыктан окуучулар сабакта. Аймакта милиция, коопсуздук кызматкерлери жүрөт", — деди Умарова.
Мектеп директору эми башталгыч класстын балдарын сабактан кийин ата-энелери алып кетерин кошумчалады.
Аталган мектепте жалпысынан 800гө жакын окуучу билим алат жана эки нөөмөт менен окуйт.
