БИШКЕК, 16-окт. — Sputnik. "Дордой" базарын түндө милиция кызматкерлери курчоого алып, учурда анын айланасынан түрмөдөн качып чыккан кылмышкерлер изделип жатканын Ички иштер министрлиги билдирди.
Маалыматка ылайык, түндө качкындар жүрүшү мүмкүн делген жерлер тууралуу маалымат түшкөн. Дароо базардын айланасы курчоого алынып, учурда милиция аталган аймак менен "Энесай" жаңы конушун тинтүүдө.
Дүйшөмбүгө караган түнү №50 түрмөдө отурган тогуз адам качып кеткен. Аларды токтотууга аракет кылган ЖАМК кызматкерлеринин үчөө өлүп, бирөө оор жарадар болгон. Ооруканага жеткирилген ал кызматкер бүгүн түнү эсине келбестен каза болду.
Атайын операция учурунда алардын бешөө кармалып, төртөө из жашырганга үлгүргөн. Учурда алар изделип жатат. УКМК кылмышкерлердин жайгашкан жери тууралуу так маалымат берген жаранга 300 миң сом өлчөмүндө каражат бере турганын билдирген.
