БИШКЕК, 14-окт. — Sputnik. Шайлоо аяктагандан кийин "Бүтүн Кыргызстан Эмгек" партиясынын өкүлүбүз деген кишилер айылга келип, салып беребиз деген футбол аянтчасынын газонун жүктөп кетүүгө аракет кылып жатканын "Кочкор Кара-Суу жаштар уюму" коомдук бирикмесинин жетекчиси Адилет Саралаев Sputnik маалымат агенттигине билдирди. Кара-Суу айылы Кочкор районунун Ак-Кыя айыл аймагында жайгашкан.
Саралаевдин айтымында, аталган партиянын тең төрагасы Аскар Салымбеков шайлоо алдында эл менен жолукканда айылдыктарга чакан футбол аянтчасын белек катары куруп берем деп сөз берген.
"Шайлоо аяктагандан кийин 2-3 күндөн соң партиянын өкүлүбүз деген кишилер келип, газонду жүктөп кетебиз деп жатышат. Бирок айыл жаштары ага уруксат бербей жатабыз. Себеби, шайлоо алдында Аскар Салымбеков өзү келип эл менен жолукканда "жаштар ылай аянтта футбол ойнойт экен, силерге мен чакан футбол аянтчасын белек кылам" деп сөз берген", — деди ал.
Аскар Салымбеков учурда өлкө аймагында болбогондуктан мындай окуя тууралуу кабары жок экенин Sputnik агенттигине билдирди.
Айыл жаштарынын айтымында, партия алып келген газон чакан футбол аянтына жетет. Аянттын тегерегин тосуу иштерин "Бүтүн Кыргызстан Эмгек" өкүлдөрү шайлоо аяктагандан кийин жасап беребиз деп айтышкан.
Белгилей кетсек, 4-октябрда Кыргызстанда парламенттик шайлоо болуп, анда 14 партиядан алты партия гана жети пайыздык босогодон өтө алган. Борбордук шайлоо комиссиясынын алдын ала берген маалыматтырына ылайык, "Бүтүн Кыргызстан Эмгек" партиясы 6,14 пайыз гана добуш алып, шайлоодо жеңишке жетпей калган.
