"Бүтүн Кыргызстан Эмгек" партиясы БШКдан добуштарды кайра саноону талап кылууда

БИШКЕК, 8-окт. — Sputnik. "Бүтүн Кыргызстан Эмгек" партиясы бир катар шайлоо участокторундагы парламенттик шайлоонун жыйынтыктарын кайра санап чыгуу талабы менен БШКга арыз жазды. Бул тууралуу Sputnik агенттигине партиянын теңтөрагасы Адахан Мадумаров билдирди.

Буга чейин айрым маалымат каражаттарында аталган партия Ош жана Жалал-Абад облустарындагы шайлоо участокторунан саналбай калган 37 миң добуштун айырмасын аныктап чыкканы айтылган. Алдын ала жыйынтык боюнча "Бүтүн Кыргызстан Эмгек" партиясы 7 пайыздык чектен өтө албай калган (6,15 пайыз). 2010-жылдагы парламенттик шайлоодо да Мадумаровдун "Бүтүн Кыргызстан" партиясына Жогорку Кеңешке келүүсү үчүн бир пайыз добуш жетпей калган. 

Мадумаровдун айтымында, БШКга арыз мыйзамга ылайык дооматтарды кабыл алуу күнү берилген.

"Биз Ош жана Жалал-Абад облустарындагы шайлоо участокторунда добуштарды кайра санап чыгууну талап кылып жатабыз. Эгер айырманын бар экени аныкталса, башка аймактарда да шайлоонун жыйынтыгын кайра карап чыгуу зарыл болот", — деди саясатчы.

Мадумаров акыйкат үчүн партия бардык мыйзамдуу аракеттерди көрө турганын белгиледи.

Буга чейин БШК төрагасы Туйгунаалы Абдраимов добуштарды кайра санап чыгууга даяр экенин, бирок партиянын бул билдирүүсү одоно кадам экенин билдирген.

Жекшемби күнү өткөн Жогорку Кеңешке шайлоодо 1,5 миллион кыргызстандык жаран 2374 участокто добуш берди.