БИШКЕК, 14-окт. — Sputnik. Былтыр 14 жаштан 17 жашка чейинки 113 өспүрүм жыныстык жол менен бериле турган хламидиоз оорусун жуктуруп алганын Улуттук статистикалык комитет билдирди.
Маалыматка ылайык, алардын 54ү боз улан болсо, 59у кыз балдар. Жалпы республика боюнча мындай дартка чалдыккандардын саны 2 миңге жеткен.
Жыныстык жол менен берилчү гарденеллез кыргызстандыктардын арасында кеңири тараган — 2014-жылы бул ооруга 11,6 миң бейтап туш болгон.
Улуттук статистикалык комитет сифилис менен жабыркаган кыргызстандыктардын саны кескин жогорулап жатканын баса белгилейт. Эгемендүүлүккө жеткен жылдан бери мындай дартка чалдыккандардын саны 13 эсеге көбөйгөн. Өткөн жылы оорулуулардын саны 1082ге жетип, алардын басымдуу бөлүгүн 20-30 жаштагы кыз-келиндер түзгөн.
