БИШКЕК, 13-июль — Sputnik. Кыргызстанда эне өлүмү, кургак учук, ВИЧ/СПИД, баңгилик сыяктуу көйгөйлөр курч турарын вице-премьер-министр Дамира Ниязалиева АКШда өткөн Жогорку деңгээлдеги экономикалык жана социалдык кеңештин саясий форумунда билдирди.
Үстүбүздөгү жылдын 6-11-июль күндөрү Нью-Йорк шаарында өткөн форумга Ниязалиеванын төрагалыгы алдында кыргызстандык делегация катышты.
Вице-премьер өз сөзүндө Кыргызстан акыркы 15 жылдын ичинде бир топ ийгиликтерге жетишкенин белгиледи.
"Ири жетишкендиктердин бири катары 2014-жылы 1,2 пайызды түзгөн жакырчылык деңгээлинин төмөндөшүн айтууга болот. Мындан тышкары, билим берүү сапатынын жакшырышы, ымыркай жана беш жашка чейинки балдардын өлүмүнүн, безгек ооруларынын азайышы байкалууда. Жогорку Кеңеште, ЖОЖ студенттеринин арасында аялдардын үлүшү боюнча гендердик теңчиликке жетишүүдөбүз", — деди вице-премьер.
Ошону менен бирге Ниязалиева Кыргызстанда эне өлүмү, кургак учук, ВИЧ/СПИД, баңгилик сыяктуу көйгөйлөр курч турарын белгилеп өттү.
Сөзүнүн аягында Ниязалиеа Кыргызстан 2020-жылга чейинки узак мөөнөттүү өнүгүү концепциясынын босогосунда турганын белгилеп, туруктуу өнүгүүнүн глобалдык максаттары улуттук артыкчылыктарды эске алуу менен жалпы концепциянын маңызы болушу керектигин кошумчалады.
