БИШКЕК, 9-окт. — Sputnik. Бишкектин Свердлов районуна караштуу "Красный строитель" жаңы конушундагы иштеп жаткан суу кампасынын аймагындагы жерлер жеке адамдарга мыйзамсыз берилип кеткени аныкталганын шаардык мэрия билдирди.
Маалыматка ылайык, кыймылсыз мүлккө болгон укукту каттоо башкармалыгы Свердлов райондук администрациясынын жасалма токтомдорунун негизинде аталган жер тилкелерин жеке жактарга пайдалануусу үчүн мамлекеттик актыларды берип келген.
Чогултулган материалдар Бишкек шаардык прокуратурага берилип, Кылмыш жаза кодексинин "кызмат абалынан кыянаттык менен пайдалануу", "жер мыйзамын бузуу", "документ жасалмалоо" беренелеринин негизинде кылмыш иши козголду.
Учурда тергөө амалдары жүрүп жатат.
