БИШКЕК, 8-окт. — Sputnik. Чийки заттын жоктугунан Кара-Балта тоо-кен комбинатынын иши токтоп калуу алдында турганын вице-премьер Валерий Диль аталган ишкананын абалы талкууланган жыйында билдирди.
Анын айтымында, комбинат ишинин үзгүлтүккө учурашы анын бонкрот болушуна алып келет. Стратегиялык мааниге ээ бул комбинаттын токтоп калбашы үчүн өкмөт бардык аракеттерди көрүп жатат.
Жыйын жүрүшүндө Диль комбинаттын ээси россиялык ишкер Виктор Вексельбергге таандык "Ренова" холдинги менен сүйлөшүүнү тездетүү зарылдыгын белгиледи.
"Инвестициялык макулдашууларга ылайык, "Ренова" ишкананы тийиштүү өлчөмдө сырье менен да камсыздашы керек", — деди вице-премьер.
Чиновник, мындан тышкары, комбинаттын алтын жана вольфрамды кайра иштетүү мүмкүнчүлүктөрүн иштеп чыгуу керектигин кошумчалады.
"Учурдагы кырдаалды эске алып, ишкананын базасында индустриалдык тоо кластерин түзүү боюнча варианттарды иштеп чыгуу керек", — деди Диль.
Кара-Балта тоо-кен комбинатын чийки зат менен көбүнесе Казакстан камсыз кылчу.
