БИШКЕК, 6-окт. — Sputnik. Чек ара аймактарындагы дарыяларды пайдалануу энергетика тармагын өнүктүрүүнүн келечектүү багыты экенин вице-премьер Валерий Диль казакстандык "К.Ойл Трейдинг" компаниясынын башкы директору Сулейман Булешов менен жолугушууда билдирди.
Анын айтымында, учурда Жалал-Абаддагы нефть иштетүүчү заводду модернизациялоо боюнча долбоор даярдалып жатат.
"Компаниянын потенциалын эске алып, биз ушул долбоорго катышуунун сунуш кылабыз. Мындан тышкары, кичи жана орто энергетика, өндүрүлгөн электр энергиясын коңшу өлкөлөргө экспорттоо үчүн чек ара аймактарында жайгашкан дарыяларды иштетүү кызматташуу үчүн орчундуу негиз болот", — деди чиновник.
Өз кезегинде "К.Ойл Трейдинг" компаниясынын жетекчиси энергетика жана нефтини кайта иштетүү тармагы кызыгуу жаратарын белгиледи.
"Жергиликтүү рыноктун абалын изилдеп чыгып, бир катар долбоорлорго токтолдук. Жакын арада иштей баштайбыз деп ойлойм", — деди Булешов.
Жолугушуунун аягында вице-премьер кыргыз өкмөтү инвесторлор менен кызматташууга даяр экенин жана аларды бардык жагынан колдой турганын баса белгиледи.
