Кыргызстан Россиянын өнөр жай ишканаларын электр жабдуу менен камсыздайт

Жазылуу
Вице-премьер кыргыз-россиялык биргелешкен ишкананы "Ореми–Тяжэлектромаш" заводунун алдында ачууну сунуштады.

БИШКЕК, 1-окт. — Sputnik.  Кыргызстандын энергетика тармагы жаңылоого муктаж экенин вице-премьер Валерий Диль россиялык ишкерлерди кабыл алуу учурунда билдирди.

Анын айтымында, аталган тармактагы жабдуулар эскирип бүткөн. Вице-премьер коопсуздуктун бардык талабына жооп берген заманбап жабдыктарга учурда суроо-талап күч экенин белгиледи.

"Биз энергетикалык тармак үчүн жабдык өндүргөн кыргыз-россиялык биргелешкен ишкана түзүүгө кызыкдарбыз. Мындай ишкананы тийиштүү база жана кесипкөй адистери бар "Ореми–Тяжэлектромаш" заводунун базасында ишке киргизсе болот", — деди Диль.

Өз кезегинде россиялык "СКБ-Автоматизация" компаниясынын башкы директору Юрий Абрамов жаңы түзүлө турган ишкананын келечеги кең экенин, анткени, энергетика тармагы үчүн өндүрүлгөн жабдуулар көптөгөн өнөр жайдын муктаждыгы экенин белгилеп өттү.

"Бул эң оптималдуу вариант. Россиялык заводдордон чыккан жабдуулар бардык стандартка жана талапка жооп бергенин эске алсак, заводдун келечеги кең болот", — деди Абрамов.

Жыйын соңу менен Диль тийиштүү мамлекеттик органдарга "Ореми–Тяжэлектромаш" заводунун базасында электр жабдууларын өндүрө турган биргелешкен ишкана ачуу маселесин иштеп чыгууну тапшырды.

Жаңылыктар түрмөгү
0