БИШКЕК, 1-окт. — Sputnik. Кыргызстандын мугалимдери жогорулатылган айлык акы алышканын Билим берүү жана илим министрлиги билдирди.
Маалыматка ылайык, аймактардагы мугалимдердин маянасы айыл жеринде иштегендиги үчүн кошумча төлөнгөн акчанын көлөмү өзгөрүүсүз калгандыктан, бир топ жогору болот.
"Мисалы, Ак-Моюн айылынын 18 миң 500 сом алган кыргыз тили жана адабияты мугалими эми 1,5 эсе көп маяна алат", — деп айтылат билдирүүдө.
Министрлик бийик тоолуу аймакта иштеген мугалимдердин маянасына да ири көлөмдөгү сумма кошулганын белгиледи.
"23 саат менен бийик тоолуу аймакта иштеген мугалим 11 миң сомдун ордуна 22 миң 636 сом алат", — деп айтылат билдирүүдө.
Ал эми айлык акынын жогорулашы менен мектеп программасындагы сааттар кыскарбай тургандыгы кошумчаланды.
