БИШКЕК, 22-сен. — Sputnik. Темир Сариев премьер-министр катары өкмөттүн ачык-айкындуулугунун кепилдиги болуп бере турганын Коррупцияяга каршы кеңештин алгачкы кеңейтилген жыйынында билдирди.
Сариев кыргыз өкмөтүнө караштуу Коррупцияга каршы кеңештин түзүлүшү өкмөттүн, жарандык шериктердин жана эл аралык уюмдардын биргелешкен демилгелерин ишке ашыруу жыйынтыгы болуп калды деп айтты.
Буга мисал катар премьер-министр биргелешкен күч-аракеттер менен корупцияны жоюуда мамлекеттик сатып алуулар тутумун, ошондой эле энергетика, курулуш тармагын, мамлекеттик менчикти башкаруу жана ЖКК тутумун реформалоо боюнча маселелерди белгиледи.
Жыйындын жүрүшүндө өкмөт башчысы аткаруу бийлик тутумундагы оң жылыштарга карабастан, жарандардын калыс сынына кабылган коррупциялык көрүнүштөр жетиштүү экенин айтып өттү.
"Бүгүнкү күнү аткаруу бийлиги элдин үнүн угууга жана жарандардын талабын эске алуу менен мамлекеттик саясатты жүргүзүүгө даяр. Өз кезегинде биз коомдун принципиалдуу позициясына жана жарандык секторго ишеним артуудабыз. Мен, премьер-министр катары, өкмөттүн ачык-айкындуулугунун кепилдиги болуп берем. Бул максатта коррупцияга каршы күрөшүү чараларын күчтөндүрүү үчүн аталган кеңешти өкмөттүн карамагында түзүү тууралуу чечим кабыл алынган", — деп кошумчалады Сариев.
Жыйынтыгында премьер-министр биргелешкен иштин үзүрү, тактап айтканда, мамлекеттик бийлик органдарынын жарандык коом институттары жана эл аралык уюм өкүлдөрүнүн активдүү диалогу, коомдогу коррупцияга каршы күрөшүү аракетин уюштуруу жана бириктирүү жаатындагы жол-жоболорду түзүү үчүн негиз болуп берерине ишеним артты.
