БИШКЕК, 22-сен. — Sputnik. Ош шаарынын ХБК кичи районунда жайгашкан кытай ишканасынын короосунда багылып жаткан 50гө чукул эшектердин кайдан келгени териштирилүүдө. Бул туурасында Ош облустук ИИМдин маалымат кызматынын жетекчиси Жеңиш Ашырбаев Sputnik маалымат агенттигине билдирди.
"Эртең менен маалымат келип түшкөн. Азырынча эшектин эттерин Кытайга экспорттоо максатында багышкан деген маалыматтар айтылууда. Азыр тактап жатабыз. Ал короо арматура жана даарат кагаздарын чыгарган кытайлык ишканага таандык болуп чыкты", — деп билдирди Ашырбаев.
Ал толук маалыматтар кийинчерээк болоорун кошумчалады.
Буга чейин Кыргызстандын Чүй облусуна караштуу Жаңы-Жер, Арашан айылдарында жана Нарын облусуна караштуу Кочкор районунун аймагында эшек эттери табылып, ал коомдун нааразычылыгын жараткан. Биринчи иш боюнча атайын комиссия түзүлүп, иш козголгон.
