БИШКЕК, 22-сен. — Sputnik. Кыргызстан өндүрүш менен алектенүүгө чындыгында эле ыңгайлуу өлкө деп билдирди бүгүнкү Бишкектеги маалымат жыйынында Россиянын экономикалык өнүктүрүү министринин орун басары Александр Цыбульский.
Анын айтымында, Кыргызстанда Россияга караганда, өндүрүштүн өзүн актай турган наркы бир топ арзан экен.
"Бизнесмендер биринчи иретте биргелешкен ишканаларды түзүү боюнча ойлонушу керек, бул эки өлкөнүн экономикасынын ортосундагы соода локомотиви болуп саналат",— деди Цыбульский.
Ал Кыргызстан менен Россиянын аймагында бизнести өнүктүрүүгө шарт түзүүгө бийлик тарабынан болушунча аракеттер көрүлүп жаткандыгын билдирди.
Январь-июль ичинде КР менен РФ ортосундагы товар жүгүртүү 878 миллион долларды түзгөн. Кыргызстандын чет өлкөлөр менен экспорт-импорт алакасы боюнча Россия биринчи орунда турат. 2014-жылы жалпы товар айланууда 25,9 пайызды түзгөн.
