БИШКЕК, 18-сен. — Sputnik. Эл аралык "Ислам мамлекети" террористтик уюмунун ишмердүүлүгүнө Борбордук Азия, анын ичинде ШКУга кирген мамлекеттерден үч миңге жакын жаран катышып жатканын журналисттерге Россиянын Федералдык коопсуздук кызматынынын директор орун басары Сергей Смирнов билдирди.
"Ислам мамлекети" дүйнө коопсуздугу үчүн ири коркунучтардын бири болуп саналат. Үч жылдын аралыгында террористтер Ирак менен Сириянын басымдуу бөлүгүн ээлеп алышкан. Мындан тышкары, алар өз таасирин Түндүк Африкага, негизинен Ливияга жайылтууга аракет кылышууда.
ИМ менен күрөшүүдө бирдиктүү фронт жок: уюмга каршы Сирия жана Ирактын өкмөттүк аскер күчтөрү, АКШ башында турган эл аралык коалиция, күрд, ливия жана ирактык шиит түзүмдөрү иш алып барууда. Куралдуу кагылыштын натыйжасында жүз миңдеген тынч жашаган адамдар курман болуп, бир нече миллиону өз өлкөсүн таштап кетүүгө аргасыз болушту.
