БИШКЕК, 17-сен. — Sputnik. Мушташты Шералы Сыдыков атындагы Республикалык олимпиада резервдик окуу жайынын тарбиялануучулары баштады деген маалымат чындыкка жатпай турганын окуу жайдын директору Муратбек Кыбраев билдирди.
Мамлекеттик дене тарбия жана спорт агенттигинин билдирүүсү боюнча, мекеменин башчысы Шейшенкул Бакиров училищенин жетекчилиги менен жыйын өткөргөн.
Жыйын учурунда Кыбраев мушташ кечки тамактан кийин болгонун белгиледи. Анын айтымында, бир нече тарбиялануучу окуу жайга жакын жайгашкан интернет-клубга чыгышкан. Алдын ала маалымат боюнча клубга төрт окуучу 20-30 мүнөткө ойноо үчүн кирген. Андан кийин клубга башка балдар кирип, тигилерди "сөзгө" чакырып кетишкен.
"Балким алар биздин балдарды башка бирөөлөр менен алмаштырып алышкандыр. Аларды жолдон эле ур-тепкиге ала башташкан. Төртөөнүн бирөөсү качып чыгып мектепке кабар берүүгө үлгүргөн. Алар келгиче берки балдар үч баланы бычак менен сайып, окуя болгон жерден качып кетишкен", — деп өз версиясын билдирди директор.
Муну менен бирге ал бычак жеген спорт мектебинин тарбиялануучулары учурда ооруканада жатканын айтты. Аларды абалы канааттандырарлык деп табылууда.
"Училищенин балдары мушташты биринчи баштады деген чындыкка коошпойт. Мында окуу жайдын мурунку тарбиялануучулары да болгон эмес", — деп кошумчалады Кыбраев.
Учурда окуя укук коргоо органдары тарабынан иликтенүүдө. Мындан тышкары, агенттикте директордун орун басары Болот Мотукеевдин жетекчилиги алдында комиссия түзүлдү. Мамлекеттик дене тарбия жана бспорт агенттиги кырсык тууралуу толук мааламыт укук коргоо органдарынын иликтөө иштери аяктагандан кийин жарыялана турганын белгиледи.
