БИШКЕК, 17-сен. — Sputnik. Республикадагы айрым шайлоо участкалары ири чатырларга жайгаша турганын биринчи вице-премьер Тайырбек Сарпашев журналисттер менен болгон жолугушуу учурунда билдирди.
Парламенттик шайлоо үстүбүздөгү жылдын 4-октябрына белгиленген. Жалпы республика боюнча 2 миң 474 шайлоо участкасы иштейт.
Сарпашевдин айтымында, аянты 40 чарчы метерден кем шайлоо участкалары ӨКМ менен Коргоо министрлигинен алынган чатырларга жайгашат.
"Бишкекте да аянты кичине шайлоо участкалары бар. Талапка ылайык, участкалар андан кең болушу керек, мындан улам аларды чатырга жайгаштыруу чечими кабыл алынган", — деди атка минер.
Биринчи вице-премьер чатырга жайгаша турган шайлоо участкаларынын ишмердүүлүгү ойлонулуп жатканын, алар кадимкидей эле иш алып бара турганын баса белгиледи.
Акыркы маалымат боюнча шайлоодо 2 миллион 670 миң 480 адам добуш бере алат.
