БИШКЕК, 15-сен. — Sputnik. Диний-экстремисттик жана террористтик уюмдар бир идеологиянын негизинде ири кылмыштуу түзүмгө айланып, тарапташтарынын санын көбөйтүп жатканын президент Алмазбек Атамбаев Тажикстанда өтүп жаткан ЖККУнун жыйынында билдирди.
Душанбе шаарында учурда Жамааттык коопсуздук келишим боюнча уюмдун Коопсуздук кеңешинин жыйыны өтүп жатат.
Атамбаев бүгүнкү күндө дүйнөдөгү аскердик-саясий кырдаал тездик менен өнүгүп жатканын, сепаратизм, улуттук жана диний экстремизм күч алганын белгиледи.
"Бир экстремисттик идеологияга негизделген диний-экстремисттик жана террористтик уюмдар ири кылмыштуу түзүмгө айланып, күндөн-күнгө тарапташтарынын санын көбөйтүүдө", — деди президент.
Анын айтымында, Афганистандын аймагында кулачын кеңири жайып келе жаткан "Ислам мамлекети" (ИМ) террористтик тобу Борбордук Азияга түздөн-түз кооптуулук жаратат.
"Эң коркунучтуусу — жарандарыбыз аталган топтордун идеяларына берилип, алардын таламын талашып согуштарга катышып жатышы, андан кийин өз жерлерине кайтып келип террористтердин максатын жайылтуусу", — деди өлкө башчы.
Мындан улам Атамбаев ЖККУнун бардык аракетин чыныгы коркунуч туудурган көйгөйлөрү чечүүгө багыттоо керектигин, бул үчүн террорчулардын чек ара аркылуу өз жоокерлерин өткөрүүсүнө бирдиктүү бөгөт коюу зарылдыгын баса белгиледи.
"Өзгөчө кырдаал түзүлгөн учурда жогорку деңгээлдеги даярдыкта турган уюм күчтөрүнүн жана каражаттарынын өз орду менен жана эффективдүү пайдаланылышы ЖККУнун эл аралык аренадагы позициясын бекемдөөгө шарт түзөт", — деди президент өз сөзүндө.
Мында Атамбаев өткөн жылдын декабрь айында ЖККУнун кризистик учурларда чара көрүү борборун түзүү боюнча туура чечим кабыл алынганын айтып, Кыргызстанда бул жаатта тийиштүү жумуштар жасалып жатканын кошумчалады.
Андан сырткары, президент Кыргызстандын мындан ары да ЖККУнун натыйжалуулугун арттыруу боюнча уюм алкагында активдүү аракеттер улана берерин белгиледи.
