БИШКЕК, 11-сен. — Sputnik. Башкы прокуратура талапкер катары катталган мурунку атка минерлерди кылмыш жообуна тартуу боюнча БШКга киргизилген сунуш шайлоо алдындагы үгүт иштерине эч кандай тиешеси жок экендиги тууралуу билдирүү таратты.
Буга байланыштуу Чудинов менен Айдаралиевди талапкер катары көрсөткөн "Бир Бол" саясий партиясы үгүт иштери маалында Башкы прокуратуранын мындай өтүнүчү жана бул маалыматтын ЖМКларда жарыяланышы партияга каршы басым экенин белгилеген билдирүү тараткан. Мындан тышкары, партия "Шайлоо жөнүндө" мыйзамына ылайык, катталган талапкерди шайлоонун жыйынтыгы расмий жарыялангыча кылмыш жообуна тартууга, камакка алууга тыюу салынарын эскерткен.
"Сунуш киргизүүнүн үгүт иштери менен дал келишинин эч кандай саясий себеби жок. Аталган сунуш 3-сентябрда чыккан өкмөттүн токтомунан кийин киргизилди", — деп айтылат Башкы прокуратуранын билдирүүсүндө.
Буга чейин Борбордук шайлоо комиссиясы партиялардын айрым талапкерлерине карата Ички иштер министрлиги тарабынан кылмыш ишин козгоого макулдук берген.
Билдирүүдө мамлекеттик, аткаруу жана жергиликтүү бийлик органдарынын үгүт иштерине катышууга укугу жок экени белгиленип, буга жол берген кызматкерлерге Башкы прокуратура чара көрөрү маалымдалган.
Ал арада Борбордук шайлоо комиссиясы Самаков, Айдаралиев жана Чудиновдун маселесин кийинки жумада чече турганын билдирген.
