Кылмыш иши козголуучу талапкерлердин маселесин БШК эмки жумада чечет

БИШКЕК, 11-сен. — Sputnik. Борбордук шайлоо комиссиясынын бардык мүчөлөрү аймактарды кыдырып жүрүшкөнүн, үч талапкердин маселеси боюнча эмки жумада гана чогула турганын Sputnik агенттигине БШК маалымат катчысы Азиз Жабиев билдирди.

Бейшемби күнү Башкы прокуратура БШКга Жогорку Кеңештин депутаты Карганбек Самаковду, экс-премьер-министр Игорь Чудиновду жана мурунку биринчи вице-премьер-министр Искендербек Айдаралиевди кылмыш жообуна тартууга макулдук берүү өтүнүчү менен кайрылды. Тергөө башкармалыгы мурунку атка минерлерди Аламүдүн районундагы жер тилкелерин мыйзамсыз трансформациялоо боюнча кылмыш жообуна тартууга ниеттенүүдө.

Жабиевдин айтымында, БШК мүчөлөрү толук чогулмайынча депутаттыкка талапкерлерди кылмыш жообуна тартууга макулдук берүү маселеси талкууланбайт. 

"БШКнын мүчөлөрү толук курамда чогула турганын билдиришти", — деди ал.

Игорь Чудинов менен Искендербек Айдаралиев БШКдан "Бир Бол" партиясынан талапкер катары катталышкан. Чудинов 2007-2009-жылдары кыргыз өкмөтүн жетектесе, Айдаралиев ошол мезгилде биринчи-вице-премьер-министр болуп турган.

Самаков ушул жылдын май айында жер тилкелерин трансформациялоодо коррупциялык аракеттерге барган деп айыпталууда. Соттун чечими менен тергөө учурунда үй камагына алынган. Самаков БШКдан "Кыргызстан элдеринин конгресси" партиясынан талапкер болуп катталган.

"Бир Бол" саясий партиясы үгүт иштери маалында Башкы прокуратуранын мындай өтүнүчү жана бул маалыматтын ЖМКларда жарыяланышы партияга каршы басым экенин белгиледи. Мындан тышкары, партия "Шайлоо жөнүндө" мыйзамына ылайык, катталган талапкерди шайлоонун жыйынтыгы расмий жарыялангыча кылмыш жообуна тартууга, камакка алууга тыюу салынарын эскертет. 

"Кылмыш ишинин козголушу аталган талапкердин шайлоого катышуусуна бөгөт коё албайт", — деп айтылат расмий билдирүүдө.

Парламенттик шайлоо 2015-жылдын 4-октябрында өтөт.