БШК кылмыш жоопкерчилигине тартылуучу талапкерлердин тагдырын жакын арада чечет

БИШКЕК, 10-сен. — Sputnik. Борбордук шайлоо комиссиясы Башкы прокуратура тарабынан кылмыш иши козголгон талапкерлердин тагдырын жакынкы күндөрү чече турганын БШК мүчөсү Канатбек Азиз билдирди. 

Башкы прокуратура БШКдан ЖК депутаты Карганбек Самаковду, экс-премьер-министр Игорь Чудиновду жана мурунку биринчи вице-премьер-министр Искендербек Айдаралиевди кылмыш жообуна тартууга макулдук берүүсүн өтүнөт. Тергөө башкармалыгы мурунку атка минерлерди Аламүдүн районундагы жер тилкелерин мыйзамсыз трансформациялоо боюнча кылмыш жообуна тартууга ниеттенүүдө.

Канатбек Азиздин айтымында, "Шайлоо жөнүндө" мыйзамына ылайык, БШК кылмыш иши козголгон жарандардын талапкер катары катталуусуна тыюу салууга укугу жок.

"БШК жыйын өткөрүп, аталган талапкерлерди кылмыш жообуна тартууга макулдук берүү жамааттык түрдө чечилет. Комиссия макулдук берүүгө да, андан баш тартууга да укуктуу", — деди БШК мүчөсү.

Канатбек Азиз БШК кылмыш ишин козгоого макулдук берүүсү аталган жарандардын талапкер катары каттоодон алууга негиз болбой турганын эскертти.

Игорь Чудинов менен Искендербек Айдаралиев БШКдан "Бир Бол" партиясынан талапкер катары катталышкан. Чудинов 2007-2009-жылдары кыргыз өкмөтүн жетектесе, Айдаралиев ошол мезгилде биринчи-вице-премьер-министр болуп турган.

Самаков ушул жылдын май айында жер тилкелерин трансформациялоодо коррупциялык аракеттерге барган деп айыпталууда. Соттун чечими менен тергөө учурунда үч камагына алынган. Самаков БШКдан "Кыргызстан элдеринин конгресси" партиясынан талапкер болуп катталган.