БИШКЕК, 10-сен. — Sputnik. Менчик спирт заводдорунун курулушуна жол берүү катачылык болгонун вице-премьер-министр Валерий Диль инвестиция жана бизнести өнүктүрүү боюнча кеңештин жыйынында билдирди.
Анын айтымында, бүгүнкү күндө алкоголдук тармактын абалы начар. Мамлекеттин алкоголдук рынокко ээлик кылуудан баш тартуусунан бюджет жок эле дегенде бир миллиард сомдон куру жалак калган.
"Завод жетекчилери учурда мыйзамсыз арак өндүрүп жатканын моюнга алышууда. Мунун баары алкоголдук продукция өндүрүү көлөмү туура эмес болжолгонуна байланыштуу", — деди чиновник.
Диль мамлекет спирт өндүрүшүн өз колунан чыгарышы Кара-Балта спирт заводунун түбүнө жеткенин кошумчалады.
"Завод кезинде жогорку сапаттагы спирт өндүрчү эмес беле. Бул тармакта тартип орнотуу зарыл. Албетте, монополияга кайта албайбыз. Мында батыш мамлекеттериндей иш алып барсак болот, ал жакта арак заводдору менчик болгону мене,н негизги продукция — спирт өндүрүү мамлекеттин катуу көзөмөлүндө турат", — деди вице-премьер.
Чиновник өкмөттүн продукцияны өндүрүү көлөмү боюнча талапты күчөтүү чечимин колдой турганын белгиледи. Анын айтымында, бул көйгөйдү толук чечпесе да, маселени аягына чыгаруунун башталышы болуп бере алат.
