БИШКЕК, 1-сен. — Sputnik. Октябрь райондук сотунун төрагасы Эрнис Чоткараев Казакстандын Астана шаарында өтө турган Борбордук Азиялык диалогго катыша турганын Жогорку соттун маалымат кызматы билдирет.
Казакстандын Жогорку Соту тарабынан Борбордук Азиядагы Penal Reform International (Эл аралык түрмө реформасы) өкүлчүлүгү менен биргеликте уюштурулуп жаткан иш-чара үстүбүздөгү жылдын 2-4-сентябрь күндөрү жабык түрдөгү мекемелердеги жашы жетелектерге карата зомбулуктун алдын-алуу маселелерине арналат.
"Иш-чаранын алкагында тегерек стол, кеңейтилген эксперттик жолугушуулар, "Балдарга карата зомбулукту түп-тамыры менен жоюу жана аларды коргоо боюнча алдыңкы практиканы калыптандыруу маселелери боюнча диалог" аталышындагы конференция өтөт", — деп айтылат билдирүүдө.
Катышуучуларга баланын укугун коргоо жана камактагы балдарга карата зомбулукту алдын-алуу боюнча орчундуу маселелерди талкуулоо сунушталат. БУУнун балдар укуктары боюнча Комитетинин Улуу Британия, Норвегия, Германия, Чехия, Индиялык эксперттери балдарды коргоо боюнча эл аралык тажрыйбаны тартуулашат.
