БИШКЕК, 25-июль — Sputnik. Балдардын коопсуздугун камсыздоого тийиштүү министрлик жана ведомстволор бирдей жооп бере турганын премьер-министр Темир Сариев өкмөттүн жыйынында билдирди.
Бул багытта Билим берүү жана илим министрлиги бир айлык мөөнөттө программаны ишке ашыруу боюнча иш-чаралардын планын иштеп чыгып, өкмөт аппаратына киргизиши керек. Ал эми Каржы министрлиги жыл сайын республикалык бюджетти түзүүдө билим берүү бөлүмү боюнча "Капиталдык салымдар" беренесинин алкагында программаны каржылоону карашы зарыл.
"Мектеп окуучулары жана мектепке чейинки билим берүү мекемелеринде коопсуздукту толук камсыз кыла турган чараларды көрүшүбүз керек. Көп жылдан бери республикадагы билим берүү тармагында алгылыктуу оңдоп-түзөөлөр болбогондуктан, азыркы тапта имараттардын дээрлик бардыгы капиталдык оңдоого муктаж. 2024-жылга чейин билим берүүнүн сапатын жакшыртуу максатында балдардын толук кандуу билим алуусуна мыкты мүмкүнчүлүктөр түзүлүшү кажет",— деди министр.
Жыйындын жүрүшүндө азыркы тапта республика боюнча үч миңден ашык билим берүү мекемелери оңдоого муктаж экендиги белгилүү болду.
Өкмөттүк жыйындын соңунда премьер-министр балдардын коопсуздугу үчүн өкмөт болгон аракетин жумшап, жергиликтүү бийлик өкүлдөрүнө жана тиешелүү министрликтер менен ведомстволорго коопсуздук толук камсыздалышы керектигин эскертти.
